ចិន៖ លោក Sam Hou Fai ចៅក្រមជាន់ខ្ពស់នៃទីក្រុងម៉ាកាវបានប្រកាសនៅថ្ងៃពុធនេះថា លោកមានឆន្ទៈក្នុងការឈរឈ្មោះជាអភិបាលនៃតំបន់រដ្ឋបាលពិសេសម៉ាកាវនៅក្នុងការបោះឆ្នោតនាខែតុលាខាងមុខ ខណៈដែលទីក្រុងមជ្ឈមណ្ឌលល្បែងដ៏ធំបំផុតរបស់ពិភពលោកមួយនេះ កំពុងព្យាយាមប្រែក្លាយខ្លួនទៅជាគោលដៅទេសចរណ៍ដ៏សំខាន់ក្នុងតំបន់ និងពិភពលោក។

លោក Sam Hou Fai ដែលជាប្រធាននៃតុលាការជាន់ខ្ពស់តំបន់រដ្ឋបាលម៉ាកាវចាប់តាំងពីឆ្នាំ១៩៩៩ បានលាលែងពីមុខតំណែងបច្ចុប្បន្នរបស់គាត់នៅសប្តាហ៍នេះ មុនពេលការប្រកាសថាលោកនឹងឈរឈ្មោះជាអភិបាលនៃតំបន់រដ្ឋបាលពិសេសម៉ាកាវ។ លោក Sam ត្រូវបានគេរំពឹងថាទំនងជានឹងក្លាយជាបេក្ខជនតែម្នាក់គត់ដែលនឹងឈរឈ្មោះប្រជែងតំណែងអភិបាលនៃតំបន់រដ្ឋបាលដ៏លេចធ្លោមួយនេះ ខណៈពុំមានបេក្ខជនណាមួយនឹងចូលមកឈរឈ្មោះឡើយ ស្របពេលលោក Ho Iat Seng ជាអភិបាលបច្ចុប្បន្នក៏នឹងបន្តអាណត្តិទីពីរដែរ ដោយអះអាងអំពីហេតុផលសុខភាព។

លោក Sam Hou Fai កើតនៅខេត្ត​ក្វាងទុង​ ភាគ​ខាង​ត្បូង​ប្រទេស​ចិន បច្ចុប្បន្នលោកមានវ័យ ៦២ឆ្នាំ អាចនិយាយភាសាព័រទុយហ្គាល់បានយ៉ាងល្អ ដោយលោកបានបញ្ចប់ការសិក្សានៅឯសាកលវិទ្យាល័យ Coimbra ប្រទេស​ព័រទុយហ្គាល់។ លោកអាចនឹងក្លាយជាអភិបាលដំបូងគេ ដែលមិនកើតនៅទីក្រុងម៉ាកាវដែលកាន់តំណែងកំពូល ប្រសិនបើលោកត្រូវបានទទួលការអនុម័តដោយរដ្ឋាភិបាលចិន។

មានមតិផ្សេងៗគ្នាជុំវិញការឈរឈ្មោះជាអភិបាលនៃតំបន់រដ្ឋបាលពិសេសម៉ាកាវរបស់លោក Sam ដោយអ្នកវិភាគមួយចំនួនសម្លឹងឃើញថា បទពិសោធន៍ និងទំនាក់ទំនងរបស់លោកជាមួយព័រទុយហ្គាល់ អាចជួយជំរុញពាណិជ្ជកម្ម និងធុរកិច្ចរវាងប្រទេសចិន និងបណ្ដាប្រទេសនិយាយភាសាព័រទុយហ្គាល់ ខណៈដែលទីក្រុងប៉េកាំងមានបំណងចង់ដាក់ទីក្រុងម៉ាកាវឱ្យក្លាយទៅជាមជ្ឈមណ្ឌលវប្បធម៌ចម្រុះ។

លោកក៏កំពុងត្រូវបានតាមដានដោយបណ្ដាម្ចាស់អាជីវកម្មកាស៊ីណូជាច្រើនផងដែរ ថាតើលោកនឹងតែងតាំងនរណាខ្លះនៅក្នុងការដឹកនាំរដ្ឋបាលរបស់លោក និងជាពិសេសនរណានឹងក្លាយទៅជាលេខាធិការហិរញ្ញវត្ថុ ដែលជាបុគ្គលគ្រប់គ្រងលើឧស្សាហកម្មកាស៊ីណូផ្ទាល់តែម្តង៕